سعودی وزارت حج کا "روڈ ٹو مکہ " پراجیکٹ کا آغاز
"روڈ ٹو مکہ " پراجیکٹ کیا ہے ؟
سعودی عرب نے اس سال پہلی مرتبہ حجاج کرام کے لیے ’’ روڈ ٹو مکہ‘‘ اقدام شروع کیا ہے۔ اس اقدام کے تحت پاکستان سمیت 7 ملکوں کو شامل کیا گیا ہے۔ یہ پروگرام سعودی عرب کے وسیع تر اصلاحات اور ترقی کی علامت سمجھے جانے والے وژن2030 کا حصہ ہے۔
سعودی عرب کی وزارت داخلہ نے ایک بیان میں کہا کہ روڈ ٹو مکہ اقدام کا مقصد عازمین کو اپنے ممالک سے آسانی کے ساتھ وصول کرنا اور ان کے حج کے طریقہ کاران کے ملک کے اندر ہی سے مکمل کرنا،آن لائن حج ویزہ جاری کرنا اور ہوائی اڈے پر پاسپورٹ کے طریقہ کار کی تکمیل کا عمل مکمل کرنا ہے۔
اس پروگرام سے مستفید ہونے والے ممالک کے عازمین کے مملکت میں نقل و حمل اور رہائش کے انتظامات کے مطابق ان کے سامان کی کوڈنگ اوران کی چھان بین، ان کے لیے مکہ اور مدینہ کے درمیان چلنے والی ٹرانسپورٹ کی سہولت فراہم کرنا ہے۔قابل ذکر ہے کہ سعود عرب کی وزارت داخلہ اس اقدام کو وزارت خارجہ، وزارت صحت، وزارت حج اور عمرہ، شہری ہوا بازی کی جنرل اتھارٹی، زکوٰۃ، ٹیکس اور کسٹم اتھارٹی، سعودی ڈیٹا اور مصنوعی ذہانت کی وزارتوں کے تعاون سے نافذ کر رہی ہے ۔
روڈ ٹو مکہ اقدام کی ایک سہولت کوڈنگ سروس ہے۔ یہ سہولت عازمین کے سامان کو یقینی طور پر اور حفاظت کے ساتھ ان کی رہائش گاہوں تک پہنچانے میں زبردست کردار ادا کر رہی ہے۔
’’ روڈ ٹو مکہ‘‘ میں کوڈنگ، حاجیوں کا سامان رہائش گاہوں تک پہنچانے کا محفوظ طریقہ
یہ سروس پاکستانی عازمین حج کو اپنے ملک میں اپنے سامان کو ترتیب دینے کے قابل بناتی ہے تاکہ یہ یقینی بنایا جا سکے کہ یہ سامان مکہ مکرمہ اور مدینہ منورہ میں ان کی رہائش گاہوں تک پہنچ جائے گا۔ حجاج کے سامان پر فلائٹ ڈیٹا اور معلومات پر مشتمل سٹیکر لگا دیا جاتا ہے۔ حجاج کرام کے پاسپورٹ کے سرورق پر ایک سٹیکر کے علاوہ ڈیٹا اور رہائش کے مقامات کی معلومات بھی درج ہوتی ہے۔ عازم حج کو ایک کارڈ دیا جاتا ہے جس میں اس کے سامان کی ساری معلومات درج ہوتی ہے۔
تبصرے
ایک تبصرہ شائع کریں